Эмлаш олди тиббий кўрик пайтида шифокорлар 2 ёшар Шокиржоннинг юрагида шовқин аниқлашди. Қатор текширувлардан сўнг болада туғма юрак нуқсони борлиги маълум бўлди. Лекин шифокорлар операцияни бола 12-13 ёшга тўлганида қилиш кераклигини айтишди. Шокиржоннинг ота-онаси операция учун пул топиш илинжида ҳатто турган уйни ҳам сотишга тайёр эдилар. Яратганнинг иродаси билан уйни сотишга эҳтиёж қолмади.
Лола Тиллаеванинг “Sen Yolg’iz Emassan” фондининг тўлиқ молиявий кўмаги билан Шокиржон 2022 йилда Франциянинг етакчи кардиожарроҳлари томонидан операция қилинди. Мана, орадан 2 йил ўтгач, бола мутлақо соғлом, лицейда таҳсил олади, технология, математика фанларига қизиқади ва келажакда олим бўлиш ниятида.
Лола Тиллаеванинг “Sen Yolg’iz Emassan” фонди 2002 йилда ота-она қарамоғисиз қолган ва аҳолининг ижтимоий ҳимояга муҳтож қатламлари болаларига ҳар томонлама ёрдам кўрсатиш мақсадида ташкил этилган. 2015 йилдан буён Фонднинг молиявий кўмагида франциялик етакчи шифокорлар томонидан Ўзбекистондаги Меҳрибонлик уйлари ва кам таъминланган оилалар фарзандларига 140 дан ортиқ мураккаб юрак жарроҳлик операциялари ўтказилди, улардан 21 таси Франциянинг Нант шаҳридаги болалар клиникасида амалга оширилди.