Пойтахтимизда ёш рассомлар ижоди намойиш этилган REGENERATION ART SPACE кўргазмасининг очилиши бўлиб ўтди. Regeneration Project арт-лойиҳаси Лола Тиллаева ташаббуси билан 2024 йилда яратилган. Ушбу лойиҳани яратиш ғояси Ўзбекистон ёш ижодкорларини кенг қўллаб-қувватлашдан иборат. Кўргазма Tashkent City Mall савдо-кўнгилочар мажмуасининг 3-қаватидан жой олди.
REGENERATION ART SPACE – бутун республикадан иштирок этувчи янги авлод рассомларининг Ўзбекистон замонавий санъати турли йўналишларини бирлаштирган асарлари ва ғояларини намойиш этадиган макон. Лойиҳа Tashkent City Mall билан ҳамкорликда амалга оширилди.
Лойиҳа доирасида 12 ой давомида кенг экспозиция намойиш этилади, кўргазманинг ҳар бир босқичи 3 ой давом этиб, унда ёш рассомларнинг замонамиз ўзбек тасвирий санъатининг ранг-баранглиги ва бойлигини акс эттирувчи ноёб асарлари тақдим этилади.